مواصفات وعيوب نيسان ليف (Nissan Leaf)

 هي سيارة نيسان الكهربائية الجديدة الأكثر مبيعا من السيارات الكهربائية, باعو أكثر من 200,000 سيارة الى الان والسيارة انتشرت في الأردن, المعلومات التالية سوف تكون كلها عن النيسان ليف .

بتفكر تقتني سيارة كهربائية بالكامل (مش هجينة - hybrid), او حابب تعرف عنها أكثر؟

خلال الخمس السنين الماضية انتشرت كثير من السيارات الكهربائية وأشهرها التسلا (Tesla), سيارة فخمة وسريعة جدا وغالية, الرابط التالي فيه معلومات سريعة عن اغلب السيارات الكهربائية المنتشرة: اسعار السيارات

مواصفات سيارة نيسان ليف :

• السيارة متطورة جدا وفيها إضافات كثيرة وحساسات بالغالب ما بتلاقيها بهذا السعر, زي مقاعد امامية وخلفية ومقود مدفأ, كروز كونترول, تحكم تلقائي بالحرارة الداخلية (Climate Control), واضويه تلقائية, شاشة, وكاميرا للرجوع وكثير أشياء أخرى.

• ممتعة جدا اثناء القيادة, السيارة قوية جدا, السيارات الكهربائية كلها كثير مختلفة عن السيارات العادية البنزين عشان بتعطيك تورك (Torque) عزم دوران عالي ومن اول جزء من الثانية, السيارة مش شغل سرعات عالية بس متعة للقيادة داخل المدينة .

• تعامل السيارة مع اللفات ممتاز (Handling) والمقود كهربائي (مش هيدروليك) سلس جدا.

• المكيف بارد جدا وببرد بسرعة.

• غير مكلفة بتاتا, معلومات أكثر بالأسفل.

• سعتها الداخلية جيدة, زي التويوتا بريوس تقريبا (Toyota Prius).

• ما بتحتاج تروح على الكازية.

• صيانة سيارة نيسان ليف قليلة جدا.

• فعالية المحرك الكهربائي عالية جدا, بتوصل 60% بينما فعالية محرك البنزين حوالي 20% تقريبا, واقصد بالفعالية قدرة المحرك على تحويل الطاقة الكامنة من شكلها الأصلي (بنزين, ديزل) (الطاقة المخزنة في البطارية لكهرباء .

• صديقة للبيئة، بما انه لا يوجد عادم ولا اطلاق للغازات التي تؤثر على طبقة الاوزون.

عيوب سيارة نيسان ليف سيارة نيسان ليف :

• المسافة الي بتمشيها بالشحنة الواحدة قليلة, إذا ساكن في عمان صعب توصل فيها ابعد من جرش او الزرقاء, على الأقل لحد ما تنتشر محطات الشحن. وتم حل المشكلة في نيسان ليف 2018
• سعر السيارة يتناقص بسرعة بسبب عمر البطارية الي هو مكلف.

المسافة والقلق من القطعة (Range Anxiety):
هذا أكثر موضوع مقلق للجميع, والسؤال الدائم, كم بتمشي بالفل؟
سيارات 2011 الى 2015 اجت ببطارية 24 kWh و2016 اجت بسعتين 30 و24 اما نيسان ليف 2018 سعة البطارية 40 kwh
البطارية من حجم 24 kWh إذا كانت جديدة بتمشي ما بين 120 - 160 كم تقريبا.
إذا كانت البطارية 85% بتمشي 80 - 140 كم تقريبا.
إذا كانت البطارية 75% بتمشي 70 - 110 كم تقريبا.

البطارية المستعملة بالليف من نوع ليثيوم ايون (Lithium - Ion) زي البطارية الموجودة في الموبايلات والابتوب, هاي البطارية عمرها طويل (حوالي 10 سنين) وبتخسر قدرتها على الاحتفاظ بالشحنة (Battery Degradation) بشكل تدريجي بطيء,

 أكثر الأمور الي بتأثر على عمر البطارية هم (بالترتيب الصحيح):

1- الحرارة, إذا ساكن في مكان حار جدا (فوق 35-40 مئوي بالعادة) او إذا بتشحن بالشاحن السريع بشكل يومي او أكثر من مرة باليوم.

2- الزمن, السيارة الي عمرها 5 سنين بالغالب سعة البطارية فيها 75%, البطارية الي عمرها 3 سنين 85%.

3- المسافة المقطوعة, عشان هيك مهم لما تشتري سيارة تتأكد انا مش ماشية كثير.

السيارة بتفرجيك على التابلو مؤشر قدرة السيارة على الاحتفاظ بالشحنة (Battery Capacity or Degradation) على شكل شحطات (Bars), لما تكون السيارة جديدة بتكون 12 شحطة, لما تكون 11 شحطة معناتها بتقدر تشحنها لحد 82% تقريبا من قدرتها لما كانت جديدة, لما تكون 10 شحطات معناتها بتقدر تشحنها لحد 75% من قدرتها لما كانت جديدة, إذا اقل من 10 شحطات يفضل ما تشتري السيارة.

يوجد برنامج اندرويد اسمه (Leaf Spy) بتقدر تشبكه على السيارة عن طريق ال (OBDII port) بعطيك معلومات تفصيلية عن صحة البطارية ومعلومات أخرى مهمة.

* سيارة نيسان الكهربائية الجديدة  ليف 2018 مسافة اعلى وسعر اقل 

العوامل المؤثرة على المسافة في نيسان ليف :

1-كيفية التعامل مع السيارةحسب طبيعة سواقتك, من اهم قواعد توفير الطاقة في السواقة بشكل عام هي إنك تسوق زي أكنه السيارة ما فيها بريك, يعني تتسارع ببطء وتخفف السرعة ببطء, السيارة بإمكانها تسترجع 50-60% من الطاقة الحركية عن طريق بريك المحرك (Regenerative Braking or Engine Braking) بس بشرط إنك ما تدعس بريك قوي.

2- التضاريس (الطلوع), السيارة بتخسر تقريبا شحطة (1 bar) من أصل 12 بكل 300 متر ارتفاع عن سطح البحر زيادة عن الاستهلاك العادي, يعني مثلا إذا سقت من الهاشمي للجامعة الأردنية.

3- المكيف او الدفاية بصرف لحد شحطة او اقل (1 bar) لكل ساعة تشغيل, ينصح أنك اتبرد السيارة او اتدفيها وانت لسا شابكها في الكهرباء وبتقدر تسوي هذا الاشي من الموبايل إذا كنت ساكن في اميركا او عن طريق المؤقت (Timer), يعني بتقدر تبرمجها تبرد السيارة الساعة 08:00 عشان لما تنزل تلاقيها باردة جاهزة.

4- درجة الحرارة, بس بشكل عام هاي مش مشكلة في الأردن لأنه الحرارة عنا معتدلة, السيارة مش صحبة مع درجات الحرارة المنخفضة جدا (تحت -20 مئوي) او المرتفعة جدا مثل العقبة.

5- ضغط العجلات, الحلو بالموضوع فيها حساس (PSI Sensor) لضغط العجلات وبتخبرك إذا وجد فيه مشكلة.

6- الصيانة العامة.

السيارة برضو فيها عدة أشياء تساعدك على التخلص من الخوف من المسافة :

1- بتفرجيك على التابلو بشكل مستمر كم كيلو بتمشي ومؤشر عن طبيعة سواقتك من ناحية التوفير, كل ما تسوق بشكل أحسن بتصير تفرجيك شجر أكثر.

2- بتقدر تسوق بنظام الأكو (Eco Mode), لما تكون السيارة على الايكو بتصير ابطء وبتشحن أكثر من البريك (Regenerative Braking) وبتقلل الطاقة الرايحة على المكيف او الدفاية.

3- لما يضوي مؤشر الشحن (Low Battery) بتمشيك 25 كيلو.

4- إذا البطارية شارفت على الانتهاء بتشغل نظام السلحفاة (Turtle Mode), بتصير السيارة بطيئة جدا لمسافة قليلة على امل توصلك.

انواع الشواحن للسيارات الكهربائية

شحن سيارة نيسان ليف يمكن شحن السيارة بطريقتين :- 

1- في البيت: وهي الطريقة الأفضل والاسهل, الشاحن الي بيجي معها من بلادها بحولوه هون الى 220 فولت وبتصير تشحن فيه مباشرة, انا حاطه في علبة حديدية على الحائط وواصله بالكهرباء, أي ابريز كهرباء عادي بنفع بس لازم يكون في ايرث ولو ما في الموضوع سهل بتوصلك سلك بحديدة في الأرض, الشحن 12 امبير وممكن يوصل 20 امبير, فيفضل ابريز 16 امبير وسلاك 2.5 ميلي.

بتحتاج السيارة حوالي 6-7 ساعات عشان اتفلل إذا كانت فاضية تماما, بس بالعادة 3-4 ساعات بتكفيني.

2- الشحن في المحطات هو الشحن السريع, 400 فولت, بشحن السيارة ل 80% خلال 30 دقيقة. للأسف الى الان ما وجدت أي محطة شحن داخل عمان, المحطة الي عند كلية الاميرة سمية وقفوها عشان ما في حدا بشحن والي عند مجمع الاعمال في المدينة الطبية مش شغالة.
الأمانة اخذت منحه من الحكومة الفرنسية لتأسيس 10 محطات داخل عمان بس لسا ما شفت منهم اشي بس الواضح انه لازم يصير في محطات كثير عشان السيارات عددها بازدياد, الى الان في حوالي 100 سيارة كهربائية في الحكومة وسمعت الحكومة تعاقدت مع رينولت على 100 سيارة أخرى, والله اعلم

على الاغلب ما راح تحتاج تشحن في المحطات بتاتا, اخر النهار بتوصلها بالكهرباء وبتروح تنام, بتفصل لحالها لما اتفلل, بتصحى الصبح بتكون مفللة.

الناحية الاقتصادية

الموضوع ينقسم لثلاثة اقسام:

1- سعر السيارة:

السيارة رخيصة إذا بدك تقارنها بسيارات من فئتها او بمميزاتها, سعر السيارات الي في البلد ما بين 8000 - 13000 حسب سنة الصنع وحالتها. السبب الرئيسي انه السيارة رخيصة انه ما عليها جمرك بس بتوقع هذا الاشي راح يتغير في المستقبل زي ما صار مع السيارات الهجينة والسبب الثاني انه السيارة بتفقد سعرها بسرعة في بلادها بسبب عمر البطارية, وطبعا إذا كانت السيارة جاية شطب (سالفج) بكون سعرها ببلاش الا شوي.
في شخص خبرني انه السيارة في الوكالة سعرها 27 ألف دينار.

2- كم بتسحب نيسان ليف كهرباء كلفة الكهرباء:

السيارة بتكلف ربع السيارات العادية وتقريبا نصف السيارات الهجينة، إذا سواقتك معتدلة بتمشي تقريبا 6 كم بكل 1 كيلو واط ساعة (kWh), يعني الكيلو متر الواحد بكلف 1/6 من الكيلو واط = 0.17 kWh
طيب كم ثمن كيلو الكهرباء؟ الحمد لله أرخص من كيلو البندورة والي هو اشي كويس عشان السيارة ما بتمشي على البندورة.
في البيت، إذا استهلاك الكهرباء عندك لحد 600 كيلو بالشهر بطلع بالمعدل سعر الكيلو 7.3 قرش, يعني الكيلومتر الي بتمشيه بالسيارة بكلفك 1.25 قرش, إذا استهلاك الكهرباء عندك لحد 1000 كيلو بالشهر بطلع معدل الكيلو واط الواحد 11.5 قرش, يعني الكيلومتر الي بتمشيه بالسيارة بكلفك تقريبا قرشين.
بأسوأ الأوضاع ما بتخيل يزيد سعر الكيلومتر الواحد الي بتمشيه بالسيارة عن 2.5 قرش, للمقارنة, الكيلومتر الواحد الي بتمشيه بسيارة هايبرد بكلفك تقريبا 5.5 قرش بنزين والكيلو بسيارة فوق ال 2000cc بكلف تقريبا 10 قروش بنزين.
بالنسبة للشحن في المحطات الحكومة أصدرت قانون انه يمنع بيع سعر الكيلوواط الواحد بأعلى من 10 قروش. ومحطات الأمانة الي راح تفتح جديد راح يكون فيها الشحن مجاني لمدة عام.

3- الصيانة:

السيارة بشكل عام قليلة الصيانة وما بتخرب كثير عشان ما فيها قطع متحركة كثير, لا في بستونات ولا قشاطات ولا بواجي ولا زيت محرك, ما في اشي اتغيره بشكل مستمر غير فلتر المكيف والبريك, فحمات بالبريك بتصمد كثير بسبب الاعتماد على بريك المحرك (Regenerative Braking).
البطارية عمرها الافتراضي 8-10 سنوات, وبعد العشر سنوات بتنزل سعتها بس بتضل شغالة ممكن كمان 5 سنين, في اميركا ثمنالبطارية الجديدة 5500 دولار من الوكالة.
اتصلت مع شركة نيسان في الأردن وحكولي انه بعملولها صيانة وقطعها متوفرة بس ما جربت بنفسي.
الظاهر انه قطع البودي متوفرة بشكل عام وقطع الميكانيك مش كثير لسا, بس رخيصة بشكل عام عن طريق eBay وكل قطعها معفية من الجمارك.

النتيجة:

النيسان ليف سيارة حلوة وواسعة وسواقتها ممتعة جدا, اقتصادية وبتوفر, مناسبة للمشاوير داخل المدينة ويفضل يكون عندك سيارة أخرى للرحلات خارج عمان.
إذا بتمشي باليوم الواحد اقل من 100 كم بتكون مناسبة, ولو أكثر ممكن بس راح تحتاج تشحنها خلال النهار ساعتين زمن.
إذا انت من النوع الي دائما موبايلك خالص شحنه وطافي يمكن هاي السيارة ما تكون مناسبة الك.

قد يعجبك ايضا 

مقارنة ما بين نيسان ليف وفورد فوكس الكهربائية

كيف يتلاعب التجار في  النيسان ليف والحل ؟

Nissan Leaf Club - Jordan